ව්‍යවස්ථාදායක සභාවේ අවශ්‍ය ඝන පූර්ණය නොමැතිව පොලිස්පති ලෙස දේශබන්දු තෙන්නකෝන් පත් කිරීමට ජනාධිපති රනිල් වික්‍රමසිංහ විසින් ගෙන ඇති තීරණය නීති විරෝධී බව නීති ක්‍ෂේත්‍රයේ අවධානය යොමුව තිබේ. පෙබරවාරි 26 වෙනි දින රැස් වූ ව්‍යවස්ථාදායක සභවේ පොලිස්පතිවරයා පත් කිරීම සම්බන්ධයෙන් පැවැති ඡන්ද විමසීමේදී එම යෝජනාවට පක්‍ෂව ඡන්ද 4ක්ද විපක්‍ෂව ඡන්ද 2ක් හා ඡන්ද 2ක් මධ්‍යස්ථව ප්‍රකාශයට පත් කෙරින. පක්‍ෂව දිනේෂ් ගුණවර්ධන, නිමල් සිරිපාල, සාගර කාරියවසම් හා සිවිල් සමාජ නියෝජිත වෛද්‍ය අනුලා විජේසුන්දර ප්‍රකාශ කළ අතර සජිත් ප්‍රේමදාස හා කබීර් හසීම් විරුද්ධව ඡන්දය දෙනු ලැබීය. සිවිල් සමාජ නියෝජිතයෙක් වූ ආචාර්ය දිනේෂා සමරරත්න හා ආචාර්ය ප්‍රතාප් රාමානුජන් යන දෙදෙනා ඡන්දය ප්‍රකාශ කිරීමෙන් වැළකි සිටියහ. ව්‍යවස්ථා සභාවේ තීන්දුවක් ගැනීම සඳහා බහුතර ඡන්දයක් එනම් ඡන්ද 5ක් තිබිය යුතු වුවද එයට පක්‍ෂව ලැබුනේ ඡන්ද 4ක් පමණි. සියලු පාර්ලිමේන්තු සාරධර්ම හා නිති රීති කඩ කරමින් කථානායක මහින්ද යාපා අබේවර්ධන තම ඡන්දය දේශබන්දු වෙනුවෙන් ප්‍රකාශ කර ඇත්තේ මෙම පසුබිම තුලය.
ව්‍යවස්ථා දායක සභාවේ මුල සුන දරණ කතානායකවරයාට ඡන්දය පාවිච්චි කල හැකි වන්නේ සමාන ඡන්ද සංඛ්‍යාවක් දෙපාර්ශවය විසින් ගනු ලැබු අවස්ථාවක පමණක් බව ව්‍යවස්ථාවේ සඳහන් නීතිය අමු අමුවේ උල්ලංඝනය කර ඇත.
පොලිස්පති ලෙස දේශබන්දු තෙන්නකෝන් පත් කිරීමේදී සිදුව ඇති අනෙක් බරපතල කාරනය වන්නේ දෙසැම්බර් 14 වන දින ශ්‍රේෂ්ඨාධිකරණය විසින් මානව හිමිකම් උල්ලංඝනය කරන ලද පුද්ගලයෙකු ලෙස ඔහුට දඩුවම් නියම කර ඇති පසුබිමකය. එපමණක් නොව ඔහුට විරුද්ධ විනයානුකූලව කටයුතු කරන මෙන් පොලිස් කොමිෂමට නියෝගයක්ද ශ්‍රේෂ්ඨාධිකරනය විසින් දෙනු ලැබීය. රටේ ජනාධිපතිවරයා හා පාර්ලිමේන්තුවේ කතානායකවරයා යන දෙදෙනා විසින් අදාල පුද්ගලයා සම්බන්ධයෙන් ශ්‍රේෂ්ඨාධිකරනය විසින් ඔහු වැරදිකරුවෙකු ලෙස තීන්දු කරමින් දෙන ලද තීන්දුව නොතකා කටයුතු කිරීම තුලින් පෙන්වන්නේ මේ රටේ පාලකයින් නීති ගරුක පුද්ගලයින් නොවන බවය.
එවැනි රටක නීතියේ ආධිපත්‍ය කියා දෙයක් පවතින්නේ නැති බව තේරුම් ගත යුතුය. පාර්ලිමේන්තු ව්‍යවස්ථාදායක සභාව රටේ ව්‍යවස්ථාව උල්ලංඝනය කරමින් ව්‍යවස්ථාදායක සභාවේ බහුතරයක් විසින් නොගන්නා ලද තීන්දුවක් තම අභිමතය පරිදි කතානායක විසින් විකෘති කිරීම ගැන අධිකරණය ඉදිරියේ නඩු පැවරීමට සංවිධාන කීපයක්ම කටයුතු කරමින් සිටින බව වාර්තාවේ.
